Elefant

Mōm jo w dōma elefanta,
Lata miyszko mi na gōrze,
Śpi we szranku, kajś przi mantlach
Przipruszōnych trocha kurzym.

Chcioł żech wziōnś go na zegroda,
Niech poszkubie trocha trowy.
Dyć sie boji slyź po schodach!
Ô szpacyrze niy ma mowy.

Helikopter. – Cie wyciōngna,
Elefantku, tak bez dach.
Ôn niy ruszy sie, ta trōmba.
Pado: – Bratku, jo mōm strach.

A jo nosza mu we kiblach
Jodła dziynnie ze dwie kary.
Dyć jo tego niy udźwigna,
Bo żech już je przeca stary.

Tōż co robić? Na rukcugu
Po laubryce gizda spuszcza,
Potym go wywieza w cugu,
We Afryce go fraj puszcza.