Dziyń postaci z bojek

Bezmała dzisiej (5.11.2019) mōmy „Dziyń Postaci z Bojek”, tōż mie sie tyż spōmniało, co za starego piyrwej „czytoł” żech tako „niymiecko” ksiōnżka z DDR ô gupim Iwanuszce. Do dzisiej pamiyntōm yno tela, że jakiś gupi synek mioł wachować możno młodszego brata, a niy spuszczać ôka ze dźwiyrzi, coby mu ôn niy uciyk. Dyć Iwanuszka go niy uwachowoł, a potym wandrowoł po lesie ze dźwiyrzami na plecach. Pamiyntōm yno ôbrozek, jak tyn Iwanuszka trefiōł niedźwiedzia w lesie. A możno było cołkym inakszy? Dyć kożdy może se sōm poczytać.

Dzisiej wejrzoł żech do interneca, a znod żech ta „niymiecko” ksiōnżka „Vom dummen Iwanuschka”, a pokozało sie, co je to bojka ôd Maksima Gorkigo. Tak to dowiedzioł żech sie, że jo niy czytoł bojki niymieckij, yno rusko, napisano po niymiecku. Życi poradzi nas sztyjc zaskoczyć 🙂

Ôbrozek znod żech we internecu, tōż możno to już je inksze wydani, niż jo czytoł, ale ôbrozki podobne.