Fraszki a powiedzynia

Dwa kokoty

19 czyrwnia, 2009 /

Lis, w piōrka nastrojōny,

Zachyncōny

Tym, że dwa kokoty

W łepach yno gupaty

Majōm, ô kury niy dbajōm,

Skrodo sie ku grzyndzie.

Kury łażōm wszyndzie,

Kokot zamias warty

Gro z drugim we karty.

A lis czeko,

Niydaleko,

Po cichu sie skrodo

I zjodo

Kura za kurōm,

Z kulturōm,

Ze smakym.

Znakym,

Że coś je niy tak,

Je kurōw brak.

Lis nabroł ôchoty

A zjod tyż kokoty.