Czy inkszy musi być inakszy?

Padajōm, co jynzyk ślōnski je ubogi, mo mało słōw, a niy idzie w nim wszyjskigo pedzieć. A mie sie zdo, co niykedy tyn jynzyk ślōnski mo wiyncyj słōw ôd tego polskigo. Poloki majōm słowo „inny“ a nic wiyncyj, a my mōmy „inkszy“ (inny), a „inakszy“ (odmienny, nie taki sam).

Jak briftryjger (listonosz) sie rozchoruje, tōż przidzie za niego „inkszy“, niy „inakszy“

Jak mōmy koło, a sie popsuje, abo nōm go kery ukradnie ze placu, tōż se muszymy kupić „inksze“. Dyć te inksze koło może być taki same, jak te stare, ale może tyż być „inaksze“. Mieli my np. koło chłopski ze rułkōm, a teraz se kupiymy damski, coby baba tyż mōgła na nim jeździć.

A jak mōmy auto, a nōm sie jako tajla popsuje, to trza iś do sklepu, abo na jakim Allegro kupić inkszo tajla, dyć trza dać pozōr, co ta tajla niy bydzie inakszo, bo nōm niy bydzie pasować.

A jako to je u Was? Widzicie tyż ta rōżnica miyndzy „inkszy“ a „inakszy“, abo padocie, co to idzie używać zamiynnie?