Dlo dziecek

Boli ptoszka

Dochtōr bado chorego ptoszka

Boli ptoszka troszka brzuszek,
Bo zjod ptoszek koszyk muszek
I kopruchōw pora wczora,
Tōż poszukoł bōł dochtora.
Dochtōr troszka ptoszka bado,
A ptoszkowi krōko pado:
-Tydziyń głodu, a sie zmiyni.
Musisz, ptoszku, jodać mynij.
Muszek dziynnie po łyżyczce.
Bez rok cołki po troszyczce.
Na koprucha kożdy piōntek
Możesz zrobić se wyjōntek,
A ku tymu kożdo strzoda
Yno suchy chlyb a woda.