Ale drzistło w telewizōr

Kupiyli telewizōr tata, marki „Agat”.
Felga staro powiesiōł pod balkym na szpagat –
Już mōmy antyna. Ôglōndać bydymy szport.
Dyć ôbroz sie „zwinōł” – je sto sześdziesiōnt volt.
Tak siadło napiynci, bo wszyscy chcōm ôglōndać.
Brat wiy, co sie świynci, bo zno sie na tych prōndach.
Umi zaradzić na to, coś pokōmbinować.
Zrobiōł stabilizator: staro ôbudowa,
Szalter z jakigoś radia. Yno trza wachować.
Jak światło trocha siadło, trza tych voltów dodać.
Dyć ôroz coś drzistło, wszysko wygorało,
Bo trzista volt prziszło, a mie sie zapōmniało
Dziwać na te wajzry. Jakiś gizdok pierōński
Zaczōn godać, ważny: Gerek, czy Jabłōński.
Tōż skōnd jo mioł wiedzieć, że skoro yno zaczōn,
Wroz wszyscy sōmsiedzi telewizory zgaszōm?
Dyć ôd tego czasu tata niy wierzōł bratu,
A do sklepu zaszoł kupić stabilizator.