A jo wola

Ludzie dzisiej robiōm kasa:
Spōłki, fyrmy, bankōw masa.
Jedyn gyszeft swōj rozwijo,
Ktoś gro w syjmie kōmedyjo.

A jo wola los robola,
Jo chca do sia panym być,
Kij do gości, tak je prościj
Iś bez życi, wolnym być…

Ludzie pijōm jakiś trunki:
Zeltry, mlyka, czy śmietōnki,
Jedyn z krauzy, drugi z szolki,
Z tytki brauzy, sznaps gorzołki.

A jo wola pić jabola,
Poczuć w gymbie siarki szmak.
Lubia, eli szpōnt wystrzeli,
A pociōngna z gwinta tak.

Ludzie dzisiej chcōm mieć willa,
Bryka, fōra, bele co.
Nowe musi być co chwila,
A jo sie z nich śmieja, bo…

Bo jo wola hrubo bola
Tak podrazić se pod rzić,
Bōnki zbijać, jabol pijać,
Wola jak sowizdrzoł żyć.