W Łubowicach bōł
żech już ze 3-4 razy, ale do terazka było to yno przi Pałacu
Eichendorffōw, a dzisiej piyrszy roz pozwiydzoł żech „cołki”
Łubowice. Wziōn żech ze sobōm dwie dziołszki z familije, coby
pokozać młodym ta nasza, ślōnsko, historyjo.
Łubowice
(niym.Lubowitz), je to wieś kole Raciborza, we gminie Rudnik.
Narodziōł sie tam, jedyn z najwiynkszych ślōnskich pisorzy –
Joseph von Eichendorff (1788-1855). Dojechać do Łubowic idzie ôd
strōny Raciborza kole 10 km na Ôpole, abo ôd Nyndze na Ciechowice
i tam przepłynyć szifym (prōmym) do Grzegorzowic. Ta drugo drōga
je możno ciekawszo, idzie tyż nawiydzić Rudy, Łynżczok (Rezerwat
Łężczok), ale trza dać pozōr, czy prōm rajzuje. Teraz praje
sprawujōm tam most we Ciechowicach i drōga je zawarto.
We Łubowicach
pojechali my prosto do Pałacu, abo ku tymu, co z niego ôstało,
trocha starych murōw. Kole Pałacu je piykny park ze „zajōncowōm
halejōm” kaj idzie se siednyć na ławce, a poczytać wiersze
Eichendorffa po niymiecku, abo po polsku (kedy bydzie po ślōnsku?)
Przed Pałacym je
Cyntrum Fundacyje mianym J.von Eichendorffa, ale tam my niy byli. My
sie wybrali kōnsek dalij, na stary kerchów. Je tam tyż grōb ôd
familije Eichendorff (ôjcowie, bracia a siostry ôd Josepha). Sōm
kerchōw, to je trocha starych grobōw, abo resztkōw pō nich. Teraz
je to piyknie powychraniane, ale połōmane płyty pokazujōm, że
musiało to wyglōndać kedyś inakszy.
Grōb ôd familije Eichendorffōw
Stary kerchōw we Łubowicach
Z kerchowa wybrali
my sie ku kościołowi. Cołki czas „szła” z nami drōżka
Eichendorffa z tabulami z jego wierszami. Na kościelnym placu
trefiyli my, a chwila pogodali z farorzym, ks.Henrykiem Rzega. Farorz
interesowoł sie skōnd my sōm, a skōnd wiymy ô Eichendorffie. Po
pożegnaniu z farorzym nawiydzili my tyz na chwila Kościōł
Narodzynio Marije Paniynki. Ôd farorza dowiedzieli my sie, że je
ôtwarty.
Plac kościelny
Kościōł Narodzynio Marije Paniynki w Łubowicach
W pojstrzodku kościoła
Kościōł
Z kościoła poszli
my już prosto ku aucie, kere czakało na nas kole starego kerchowa,
a pojechali my do Brzeźnice, kaj stoji młyn ôd libsty
eichendorffowej, co pisoł ô nij we wierszu „Złōmany
piestrzōnek”. Z Brzeźnice już bez Racibōrz pojechali my na
Rybnik.
Młyn we Brzeźnicy
Młyn we Brzeźnicy
Możno jeszcze
wybiera sie kedy na wiesiady do Eichendorffa, ale chca tyż po drōdze
nawiydzić inksze pałace we Gminie Rudnik, bo je ich tam bezmała
pora.
Prōba tłōmaczynio wierszy Eichendorffa:
Złōmanypiestrzōnek
Je
sam
cicho dolina, Przi
rzyczcestojimłyn, Libstymojij
już ni
ma,
Wspōminekzostołtyn.