Mieli my dzisiej (14.08.2016) piykno pogoda, tōż wybroł żech sie Velorexym na mało rajza po Ślōnsku kole 150 km. Chcioł żech „poszukać” tego dyskretnego uroku Ślōnska w Krajiku Hulczyńskim, o kerym pisze Ewa Twarda (Eva Tvrda) w swojij ksiōnżce. Zaczło sie w Rybniku, co chyba ni ma dziwne, potym bez Wodzisław, Chałupki i Rudyszwałd wjechoł żech do Czechōw w Silherovicach. Je tam piykny zōmek i tam bezmała miyszko autorka ksiōnżki. Dalij jechoł żech doDarkowiczek (Darkovicky), kaj sōm stare bōnkry z czasōw wojny. Dalij moja cesta wiōdła na rynek do Hulczyna (Hlucin), tam udało mi sie kupić porcyjo „zmarzliny” i trza było jechać dalij, dookoła zalywu, bez Dehylov, Dobroslavice do Jilesovic, kaj je Kaplica św.Jana Nepomucyna . Krōtko pauza i jadymy dalij do Haja ve Slezsku, a potym dłōższo pauza przi pałacu z Dolnym Beneszowie (Dolni Benesov). Dalszo rajza bez Bohuslavice, Bolatice do Kobieric i pomału zbliżōmy się do głōwnego pōnktu rajzy – do Rohova, o kerym pisze Eva Tvrda we swojij ksiōnżce. Jeszcze yno kościōł we Sudicach i sōm my nazod we Polsce, we Pietraszynie. Sam na krōtko stowōmy przi pōmniku postawiōnym od Antōna i Euphemie Neblik (kto to bōł?) i trza sie śpiychać du dōm, bo sie ćmi, tōż wartko na Krzanowice, Borucin, Bolesław, Tworków, Krzyżanowice (von Lichnovsky), Buków, Lubomia, Pogrzebień, Kornowac, Rydułtowy i już my sōm w dōma. Po drōdze, we Lubomii, brakło bynziny we Velorexie, a rezerwa zatkano, ale było to kole tanksztele prawie, tōż stykło sie skulać kole 200 m z gōrki. Była to jedyno, nieprzewidziano przigoda. Na kōniec o tym, czy udało mi sie znojś tyn „dyskretny urok Ślōnska? Jo myśla, że ja, a Wy możecie se go poszukać na mojich fotkach, abo wybrać sie kedy do Krajiku Hulczyńskigo, abo do Opawy.
Fojerman
Bōnkry Darkovivky
Hulczyn/ Hlucin
Hulczyn
Kościōł w Hulczynie
Kaplica św. Jana Nepomucyna we Haju na Ślōnsku
Haj we Slezsku
Haj ve Slezsku
Bolatice
Wieś Rohov
Kościōł we Sudicach
Pōmnik postawiōny od Euphemie i Antōna Neblik we Pietraszynie