Wieś Brzeźnica, gm. Prudnik, pow. raciborski, abo śladami Eichendorffa
Tym razym pojechoł żech na północ od Raciborza. Chcioł żech dojechać do prómu na Odrze Grzegorzewice – Ciechowice. Jechoł żech od stóny zachodnij, od Grzegorzowic, a nazod planowoł żech wrócić sie bez Ciechowice do Babic, na Łynżczok. Próm w Grzegorzowicach bół zawarty, tóż żech musioł jechać nazod, ale bół żech na to przigotowany, tóz nic złego si nie stało. Ni mioł żech mapy ze sobóm i jechoł żech tak „podle słóńca” wschód - zachód. Przejyżdżół żech min bez wieś Łubowice, kero zdała mi sie skónś znano, ale żech nie wiedzioł skónd i żech tam nie stanół. W miejscowości Brzeźnica znod żech drógowskaz na młyn wodny, tóz żech tam skrynciół. Na miejscu spotkoł żech chopa, kery mi poopowiadoł, że młyn noleżoł kedyś do jednego gospodorza, kaj na zolyty ku cerze chodziół poeta Joseph von Eichendorff. Teraz żech już wiedziol skónd znóm te Łubowice (Lubowitz). To tam urodzxiół sie Eichendorff w 1788 roku. W Łubowicach powiesiyli piyrsze w Polsce tabule miejscowości po polsku i niymiecku w 2008 r..
Tyn młyn je teraz wykupióny bez Towarzistwo im. Eichendorffa. Je ón odnowióny i bezmała przijyżdżajóm tam wycieczki i wtedy je ón puszczany i miele mónka. Jo tam żodnego nie trefiół, ale możno kery z Was bydzie mioł wiyncyj szczynścio.
We wsiach dookoła idzie bezmała trefić jeszcze resztki po pałacach, kere były przewaznie spolóne we 1945 roku. Jo nie trefiół tych pałaców, ale możno jeszcze kedy sie tam wybiera. W Łubowicach je tyż bezmała jakiś Muzeum im.Eichendorffa.