Zaglóndóm tak na forum, czytóm, co ludzie piszóm, abo godajóm i widza, że coroz wiyncyj ludzi używo „po ślónsku” polskigo imiesłowa przisłówkowego współczesnego

(imiesłów przysłówkowy współczesny – bezosobowa forma czasownika wyrażająca czynność trwającą równocześnie z inną czynnością).

Co by to powiedzieć prościj, taki polski tekst np.

idąc drogą palił papierosy (jednocześnie szedł i palił)

tłómaczóm ludzie po ślónsku :

idónc drógóm kurzół cygarety,

Abo inkszy przikład:

jedząc obiad czytał gazetę

tłómaczóm na:

jedzónc obiod czytoł gazeta

Trza powiedzieć, że godka ślónsko nigdy nie znała takigo pojyncio i takich wyrazów:

idónc, piszónc, godajónc, śpiónc, pijónc atp

Po ślónsku było to dycko bardziyj „opisowo” np.

szoł drógóm i kurzół cygarety,

abo

jak jod obiod, to czytoł przi tymu gazeta

czy

czytoł gazeta przi obiedzie.

Co by to lepszy pokozać, jeszcze pora przikładów polskich i ślónski tłómaczynia”

dziadek siedząc za piecem palił fajkę

po ślónsku powiymy:

starzik (ópa) siedzioł za piecym i kurzół fajfka.

Chłopak odrabiając zadanie grał jednocześnie na komputerze

po ślónsku bydzie :

synek pisoł zadani i groł ta kómputerze

Co by to podsumować:

po polsku powiymy:

robiąc to, robił jednocześnie to (idąc – palił, jedząc – czytał, siedząc – palił, pisząc - grał)

a po ślónsku:

robiół to i robiół to (szoł i kurzół, jod i czytoł, siedzioł i kurzół, pisołi groł)

Móm nadzieja, ze pomoże to kómuś w lepszym poznaniu zasad ślónskij godki.

Fojerman