Zy mie ni ma żodyn rechtór, tóż nie byda Was sam „uczół” godać po naszymu. Spóbuja yno wyjaścić pora spraw, z kerymi sóm móm problymy, abo coch sie z nimi spotkoł na ślónskich forach. Na pewno nie bydzie to cało wiedza o ślónskij godce, a jedynie pora przikładów. Kto chce się dowiedzieć wiyncyj, to musi poszukać w fachowych ksiónżkach.
Na poczóntu pora uwag; kaj bydzie pisać „ó”, to je to ślónsko literka, tako ja we słowie kóń, słónce.
Byda sam pisoł podle rybnickij pisownie, tóż na pewno bydzie to trocha inksze, niż kole Katowic, abo kole Opolo, tóż Wy piszcie, abo godejcie, jako sie godo u Was.
Przikłady:
Was – wos
kery – ftory
ni – niy
był – bół
sztwierć - ćwierć
Mie sie rozchodzi bardzij o to, co by sam pokozać pora ślónskich słówek i zastosować ich we zdaniach.
Byda sam dociepowoł materiały, tóż czytejcie i piszcie uwagi. Piszcie tyż, z czym mocie problymy w godce, abo jaki felery znojdziecie w tych mojich tekstach
