|
|
2007.11.11
Śniyg na Ślónsku
A na Ślónsku śnieżyk leci,
Sypie sie z nieba od rana,
Tóż sie fest radujóm dzieci,
Że bydóm lepić bałwana.
A na Ślónsku dzisiej bioło,
Choćby rozpruł kto pierzina,
Wszyndzi czysto, naokoło,
Nasuło i do kómina.
Tóż sie sadze wylynkały:
Cóż to z nami teraz bydzie?
Kómin bydzie bioły cały?
Bioły kurz bydymy widzieć?
Dyć, co wy sie tak starocie?
Jak prziłoży kto do pieca,
Obejrzicie czym dychocie -
Ślónsk zaś bydzie czorny, przeca.
Fojerman
|
|