2008.01.10
Rzyka
Płynyła roz rzyka,
taki cud przirody,
miała pełno mlyka
w sobie, zamias wody.
Płynyła opacznie,
niy do morza, wcale,
a wóniała smacznie,
choćby kakauszale.
Niy móg bez nia przelyź
żodyn, ani rusz,
choć próbowoł keryś.
Mosty miała wzdłóż.
Bez lato, czy w zimie,
dycko była gorko.
Możno dali płynie
i keryś jom spotko?
Tóż, jak zawrzesz oczy
kedyś, czytelniku,
możno zejrzisz, w nocy,
ta rzyka, we śniku.
Fojerman
|